كل حاجتي
سياسة الخصوصية
آخر تحديث 2026-08-15
لو استخدمتي التطبيق من غير حساب
تقدري تتصفحي كل حاجة من غير ما تسجلي. في الحالة دي مابنعرفش مين أنتِ، لكن فيه حاجتين بتتسجلوا عندنا: لو سمحتِ بالإشعارات بنحتفظ برمز إشعارات خاص بجهازك ونوع الجهاز ومعاهم الاهتمامات اللي اخترتيها، ولو دوّرتي على حاجة بنسجل الكلمة اللي كتبتيها وعدد النتايج عشان نعرف الناس بتدوّر على إيه ومش لاقياه. البحث مش مربوط بيكي ولا بجهازك.
لو عملتي حساب
بنحتفظ ببريدك الإلكتروني بس، عشان تسجيل الدخول — مفيش باسورد أصلاً، بنبعتلك كود على الإيميل. ومن ساعتها رمز الإشعارات بتاع جهازك بيبقى مربوط بحسابك.
اللي مابيخرجش من موبايلك
متابعة الدورة الشهرية بتتخزن على جهازك أنتِ بس. ماحدش عندنا بيشوفها، وماهياش بتتبعت لأي سيرفر، ولما تمسحيها بتتمسح خالص.
قائمة الفرح
بتتخزن على جهازك. لو سجلتي دخولك واخترتي تحفظيها على حسابك، وقتها بس بتتبعت لنا نسخة عشان تفضل معاكي لو غيّرتي الموبايل.
لو سجلتي بازار معانا
بنحتفظ بالاسم والإيميل ورقم التليفون وبيانات البازار اللي كتبتيها، عشان نراجع الطلب ونرد عليكي. البيانات دي بنستخدمها للطلب ده بس.
الأماكن والإعلانات
إحنا عمرنا ما بنشارك بياناتك الشخصية مع الأماكن ولا المعلنين اللي في التطبيق. بيوصلهم أرقام مجمّعة بس — كام مرة ظهر الإعلان وكام مرة اتضغط عليه في اليوم — من غير أي حاجة تخص شخص بعينه.
حقوقك
تقدري تمسحي حسابك في أي وقت من صفحة «الملف» جوه التطبيق. الحذف نهائي وبيشيل ملفك وقائمة الفرح المحفوظة على حسابك. بس الإشعارات مابتقفش بالحذف: الاهتمامات اللي اخترتيها متسجلة على الموبايل نفسه مش على حسابك، فالإشعارات المرتبطة بيها بتفضل توصلك. عشان توقفيها، اقفلي الإشعارات للتطبيق من إعدادات الموبايل.
للتواصل
لأي سؤال أو طلب يخص خصوصيتك أو بياناتك، ابعتيلنا على privacy@kolhagty.com وهنرد عليكي.